Öryggis- og umgengisreglur

Þessar reglur gilda um alla starfsemi Skotfélags Reykjavíkur: skotskýlið og haglavellina á Álfsnesi og sali félagsins í Egilshöll. Fyrst koma almennu reglurnar sem gilda hvar sem er á svæðum félagsins, en fyrir neðan eru sérreglur fyrir hvert svæði. Öryggisreglur einstakra skotgreina ganga framar almennu reglunum, og á mótum og lokuðum æfingum geta aðrar reglur gilt — þær eru þá kynntar þátttakendum.

Almennar reglur

Reglurnar hér að neðan gilda á öllum svæðum félagsins, hvort sem er úti á Álfsnesi eða inni í Egilshöll.

1. Allir sem æfa eða koma á svæði félagsins bera ábyrgð á eigin öryggi og skulu kynna sér þessar reglur.
2. Skotvopn skal koma með í tösku eða umbúðum á æfingasvæðið og ganga þannig frá því þegar æfingu lýkur.
3. Byssa sem ekki er verið að skjóta úr skal ávallt standa opin og óhlaðin og vera merkt sýnilega — merki (flag) í skothólfi eða þráður í gegnum hlaup.
4. Hlaða má byssu aðeins á skotlínu eða skotstæði og aðeins með leyfi skotstjóra eða æfingastjóra.
5. Þegar farið er fram fyrir skotlínu, til dæmis til að skipta um skotmörk, er öll meðferð skotvopna bönnuð og skulu þau standa opin og óhlaðin.
6. Hlaupi skal ávallt beina í viðurkennda skotstefnu og aðeins má skjóta á viðurkennd skotmörk. Bannað er að skjóta á fugla eða önnur dýr.
7. Þegar fleiri en einn eru við æfingar skal skipa skotstjóra eða æfingastjóra. Hann stýrir æfingunni og ber ábyrgð á að reglunum sé fylgt, og skotmönnum er skylt að hlýða fyrirmælum hans.
8. Aðeins má nota skráð skotvopn á svæðinu og skal skotmaður geta sýnt skotvopnaleyfi sé þess óskað.
9. Áfengi og önnur vímuefni eru stranglega bönnuð á skotsvæðum félagsins.
10. Sérreglur einstakra svæða og öryggisreglur einstakra skotgreina ganga framar almennu reglunum.
11. Tína skal upp skothylki og rusl að æfingu lokinni og ganga frá búnaði á sinn stað. Góð umgengni er hluti af örygginu.
12. Brot á reglum geta varðað áminningu, brottrekstri af svæðinu og kæru til lögreglu ef um lögbrot er að ræða.

Haglavellir á Álfsnesi

Á haglavöllunum fer fram æfing í haglabyssum, svo sem trap, skeet og öðrum haglagreinum.

1. Ólar skulu vera fjarlægðar af haglabyssum áður en æfing hefst.
2. Byssa er aðeins meðhöndluð á skotstæðinu; öll önnur meðferð þarf leyfi æfingastjóra.
3. Milli byssugeymslu eða vallarhúss og skotstæðis skal byssan vera í umbúðum, en heimilt er að bera hana óvarða þá stuttu leið enda sé hún opin og óhlaðin og hlaupi beint upp.
4. Byssa sem ekki er verið að skjóta úr skal standa opin og óhlaðin.
5. Hlaða má byssuna aðeins eftir að staða hefur verið tekin, hlaupi beint í viðurkennda skotstefnu vallarins og æfingastjóri hefur heimilað það.
6. Ef skoða þarf skotmark eða ganga frá vélbúnaði skal byssan standa opin og óhlaðin og er meðhöndlun hennar bönnuð á meðan.
7. Aðeins skal skjóta í skotstefnu vallarins og á viðurkennd skotmörk.
8. Skylt er að nota heyrnahlífar og öryggisgleraugu.
9. Að æfingu lokinni skal tína upp tóm skothylki og annað rusl. Sá sem stýrir æfingunni sér um að slökkva á vélum, loka lúgum og ganga frá snúrum.

Riffilskýlið á Álfsnesi

Í skotskýlinu fer fram æfing í riffilgreinum, skammbyssum og loftgreinum utandyra.

1. Byssa skal tekin úr tösku opin og óhlaðin og skal það vera greinilegt. Riffill með boltalás skal vera án bolts í töskunni og má boltinn aðeins vera í rifflinum meðan verið er að skjóta. Aðrir lásar skulu hafa þar til gert merki í áberandi lit í skothólfi.
2. Hlaupi skal vísa upp þegar byssa er tekin úr tösku og þar til stöðu er tekið við skotlínu. Við skot skal hlaup vísa að skotmarki og hlaupendi ná fram yfir skotlínu.
3. Öll meðhöndlun skotvopna utan skotlínu eða skotborðs er óheimil nema með leyfi skotstjóra.
4. Þegar rauða ljósið er kveikt, sem táknar að heimilt sé að ganga út á skotbana, skulu allar byssur vera opnar og óhlaðnar. Óheimilt er að ganga yfir rauðu línuna á almennum æfingum. Á mótum og keppnisæfingum getur skotstjóri veitt undantekningu, enda standi allar byssur opnar og óhlaðnar.
5. Óheimilt er að fara út á skotbana án öryggisvestis félagsins.
6. Skylt er að nota heyrnahlífar.
7. Á almennum æfingum má aðeins hlaða einu skoti í einu og telst hlaðið magasín hlaðin byssa. Tvíhleypta riffla má þó hlaða tveimur skotum, að því tilkynntu við skotstjóra áður en æfing hefst.
8. Í þeim greinum þar sem hlaða þarf í magasín á æfingum gilda reglur viðkomandi greinar og stýrir skotstjóri þeim.
9. Byssur skulu vera í rekka þar til æfing hefst, og skammbyssur ávallt í umbúðum milli staða.
10. Aðrir en skyttur skulu halda sig aftan við grænu línuna og sýna háttvísi í umgengni.
11. Aðeins má skjóta á fyrirfram ákveðna skotbakka og viðurkennd skotmörk. Bannað er að skjóta á sveiflur og á silúettur ætlaðar .22LR með öðrum kalíberum, svo og á skotmörk í mannslíki, skotmörk sem valda sóðaskap eða geta skapað hættu á endurkasti.
12. Leitast skal við að nota hlaupbremsur í hófi þegar fleiri en einn eru í brautinni.
13. Að æfingu lokinni skal fjarlægja notaðar skotskífur, tína skothylki og rusl og setja búnað á sinn stað.

Púðursalur og loftsalur í Egilshöll

Innanhúss eru 10 m loftsalur með 16 brautum og 50 m púðursalur með 6 brautum.

1. Í púðursal er aðeins skotið úr 22LR rifflum og skammbyssum, en í 10 m loftsalnum úr loftskotvopnum.
2. Byssa skal standa opin og óhlaðin með merki í skothólfi þegar hún er ekki í notkun, og hlaupi ávallt beint í átt að skotmarki.
3. Hlaða má byssuna aðeins á skotstæðinu.
4. Skylt er að nota heyrnahlífar.
5. Á miðvikudagskvöldum fer fram skammbyssuæfing í púðursal og er þá lokað fyrir riffla.
6. Áður en skotið er skal ganga úr skugga um að allir séu komnir í stöðu og að merki hafi verið gefið. Við bilanir eða þegar gengið er að skotmörkum skulu allar byssur standa opnar og óhlaðnar.
7. Að æfingu lokinni skal fjarlægja notaðar skotskífur, tína skothylki og rusl og setja búnað á sinn stað.

Efni um einelti, áreitni og ofbeldi í íþróttastarfi, ásamt hlekkjum á aðstoð, er á síðunni Öruggt íþróttastarf.

Spurningar?

Hafðu samband á sr@sr.is eða við skotstjóra eða stjórn félagsins.