Hlaupmiðun auðveldar stillingu kíkja á rifflum. 
Hlaupmiðun: Horft er í gegnum hlaup a. á skotskífu og kíkir b. stilltur í miðju hennar.
Hlaupmiðun er fljótleg og einföld leið til að stilla kíkja á rifflum !   Áður en hafis er handa við að stilla kíkinn á rifflinum þarf að ganga úr skugga að kíkirinn sé rétt festur á riffilinn. Það er mjög áríðandi fyrir byrjendur að fá aðstoð þeirra sem til verka kunna í þeim efnum. Það eru ýmis atriði sem þurfa að vera rétt í ásetningu kíkis áður en farið er að skjóta úr rifflinum. Td. getur verið spenna á kíkinum í festingunum ef þær eru ekki í réttri línu á láshúsi riffilsins. Það getur verið að kíkirinn sé ekki lóðréttur í festingunum, þ.e. krossin hallar, sem leiðir til þess að riffillinn setur til vinstir eða hægri á öðrum færum en þeim sem hann er núll-stilltur inn á.
Eftir að gengið hefur verið úr skugga um að kíkirinn sé rétt festur á riffilinn getur stilling hans hafist. Við stillingu kíkja og hlaupmiðun er best að byrja á að setja upp skotskífu á 25 - 100m færi eftir aðstæðum og koma rifflinum fyrir í skorðum (mynd að ofan) þannig að þegar horft er í gegnum hlaupið, sést skotskífan í því miðju (mynd A). Krossin í kíkinum er síðan færður á miðja skotskífuna með hliðar- og hæðarstillingunum (mynd B). Þegar þessu er lokið þarf að fínstilla kíkinn. Það er gert með því að skjóta þremur skotum á skotskífuna til að sjá ákomuna þ.e.a.s. hvar kúlurnar lenda. Þegar ákoman er eins og mynd neðst til vinstri sýnir, þarf að finna miðju hennar og mæla síðan fjarlægð milli miðju skotskífu og miðju ákomu eins og sýnt er á myndinni. Til að stilla kíkinn svo að kúlurnar lendi í miðri skotskífu, þarf að færa hæðar- og hliðarfærslurnar í samræmi við fjarlægð frá miðju ákomu að miðju skotskífu. Ef við gefum okkur að ákoman sé 7,5cm fyrir neðan og 5.0cm til hægri, þarf að færa hæðarstillingu u.þ.b. 12 klikk upp og hliðarstillingu u.þ.b. 8 klikk til vinstri miðað við að hvert klikk / færsla á kíki sé ¼ úr tommu á 100 yards / metrum eða uþb. 8-10mm á 100m. Það sem raunverulega er að gerast við þessa stillingu er að krossinn í kíkinum er færður frá miðju skotskífu á miðju ákomunar. Þessa stillingu er einnig hægt að framkvæma með riffilinn stöðugan í skorðum, horfa á skotmarkið í kíkinum og færa krossin í miðju ákomunar. Þegar þessu er lokið, er aftur skotið þremur skotum eða fleiri til að ganga úr skugga um að stillingin hafi verið rétt framkvæmd og að miðja ákomunar sé í miðri skotskífu, nákvæmlega þar sem miðað var. Kíkir með mikilli stækkun, 10X og meira eru oftast með parlaxstillingu. Parlax er það þegar riffillinn er td. fastur í skorðum á borði og horft er í gegnum hann á fastan hlut í vissri fjarlægð td. á 100 metrum og augað síðan fært örlítið til, en samt ekki það mikið að sjónmyndin hverfi, þá á krossinn að vera hreyfingarlaus á sama punktinum. Ef hreyfing er á krossinum, hann færist til upp eða niður og til hliðar er parlax í kíkinum. Það sem gerist við þessar aðstæður er að brennipunktur myndarinnar er rétt fyrir framan eða aftan krossin í kíkinum. Til að stilla þessa hreyfingu út er sérstakur búnaður á kíkjum með mikilli stækkun og oftast eru færin merkt inn á parlaxstillinguna. Stundum er þetta kallað að fókusera á rétt færi. Kíkjar ætlaðir til veiða eru sjaldnast með þessum búnaði, enda eru kíkjar með stækkun til allt að 10X parlaxfríir út á 300 metra færi, eða parlax er það lítill að augað greinir það varla enda kemur það ekki að sök í veiði, þar sem skekkjan er ekki meiri en u.þ.b. 2 cm á 400 metra færi.
Það er misjafnt inn á hvaða færi menn stilla riffla sína, en það fer oft eftir skotastærð ( caliberi ) og til hvaða nota riffillinn er ætlaður. Íþróttarifflar eru oftast með sérstökum mark-kíkjum sem hægt er að stilla inn á mörg mismunandi færi með sérstökum markturnum. Algengt er að meðalstórir veiðirifflar með hefðbundnum kíki séu stilltir inn á 200 metra færi og er þá ákoman á 100 metrum ein og hálf til tvær og hálf tomma ( 5 - 6 cm ) yfir og allt að tíu tommur undir á 300 metrum ( 25 cm ). Þegar riffil er stilltur inn á 200 metra færi er ákoman nánast eins á 200 metrum, 50 metrum og 150 metrum. Mynd hér að neðan til vinstri sýnir hvernig miðja ákomu er merkt og síðan fjarlægð hennar mæld frá miðju skotskífu. Myndin til hægri sýnir stillihnapp á kíki. Takið eftir að eitt klikk er 1/4 tomma (ca. 6 mm) á 100 yards ( 90 metrar). Færsla um fjögur klikk er því uþb. 2,5 cm á 100 metrum, uþb. 5,0 cm á 200 metrum og uþb. 7,5 cm á 300 metra færi.  
|
