Norðurlandamótið í skotfimi er haldið um helgina í Osló. Íslands á þar keppendur sem eru: Helga Jóhannsdóttir og Dagný Huld Hinriksdóttir sem keppa í Skeet, Íris Eva Einarsdóttir í Loftriffli, Guðlaugur Bragi Magnússon og Jakob Þór Leifsson í Skeet og Guðmundur Helgi Christensen í riffli. Ómar Örn Jónsson úr stjórn STÍ er fararstjóri.

https://www.nordicshootingregion.com/

Íslandsmót Skotíþróttasambands Íslands í haglabyssugreininni Skeet fór fram á velli Skotfélags Reykjavíkur á Álfsnesi um helgina. Í karlaflokki varð Sigurður Unnar Hauksson úr Skotfélagi Reykjavíkur Íslandsmeistari, annar varð Hákon Þ. Svavarsson úr Skotíþróttafélagi Suðurlands og í þriðja sæti Guðlaugur Bragi Magnússon úr Skotfélagi Akureyrar. Í liðakeppni karla varð sveit Skotíþróttafélags Suðurlands Íslandsmeistari en hana skipuðu Hákon Þ.Svavarsson, Jakob Þ. Leifsson og Aðalsteinn Svavarsson. Íslandsmeistari í unglingaflokki varð Daníel Logi Heiðarsson úr Skotfélagi Akureyrar og í öðru sæti varð Ágúst Ingi Davíðsson úr Skotíþróttafélagi Suðurlands. Í öldungaflokki varð Davíð Ingason úr Skotíþróttafélagi Suðurlands Íslandsmeistari. Í kvennaflokki varð Snjólaug María Wium Jónsdóttir úr Skotfélaginu Markviss, önnur varð Helga Jóhannsdóttir úr Skotíþróttafélagi Suðurlands og í þriðja sæti Dagný Huld Hinriksdóttir úr Skotfélagi Reykjavíkur. ÂÂ Í liðakeppni kvenna setti lið Skotfélags Reykjavíkur nýtt Íslandsmet en sveitina skipa Dagný Huld Hinriksdóttir, Eva Ósk Skaftadóttir og Þórey Inga Helgadóttir.

Hérna kemur tímatafla Íslandsmóts STÍ í Skeet sem fram fer á velli félagsins á Álfsnesi um helgina.

Nú er Íslandsmótið í SKEET framundan en það verður haldið á skotvöllum okkar á Álfsnesi 18.-19.ágúst n.k. Yfirdómari mótsins verður á skotsvæðinu dagana 16. og 17.ágúst kl.18-21 og verður með búnaðarskoðun, m.a. mælir hann rétta staðsetningu á hæðarborðanum samkvæmt nýjustu reglum.

Við minnum keppendur á að koma skráningum sínum á mótið til sinna félaga, en félögin safna skráningum saman og senda til STÍ og mótshaldara, SR. Lokafrestur fyrir félögin er að kvöldi þriðjudagsins 14.ágúst.

Skotfélag Reykjavíkur hélt riffilnámskeið síðustu helgi fyrir félagsmenn sína sem hafa keppt fyrir félagið undanfarin misseri í ISSF riffilskotgreinum. Auk þeirra tóku þátt tveir félagsmenn Skotíþróttafélags Kópavogs sem eru á leiðinni á heimsmeistaramót í S-Kóreu síðar í haust.

Kennarar á námskeiðinu voru þau Snjezana Pejcic frá Króatíu og Steffen Olsen frá Danmörku en þau eru bæði afburða keppnismenn í loftriffli, prone og þrístöðu í 50 og 300 m riffli. Snjezana á t.d. gildandi heimsmet í þrístöðu kvenna, er í efsta sæti heimslistans í þrístöðu, vann til bronsverðlauna á Olympíuleikunum í Peking og hefur unnið til yfir 20 verðlauna á heimsmeistara-, Evrópu- og heimsbikarmótum. Steffen er margkrýndur danskur meistari og hlaut silfur í þrístöðu á síðasta heimsbikarmóti í Fort Benning og er í níunda sæti á heimslistanum í þrístöðu. Einnig lumar hann á fjölmörgum Danmerkurmetum í hinum ýmsu riffilgreinum.

Æfingabúðirnar tókust með eindæmum vel og voru Snjezana og Steffen iðin við að segja nemendum til, stilla riffla og lagfæra stöður. Margir „ósiðir“ voru lagaðir svo sem takmörkuð eftirmiðun sem hrjáði flesta! Það var gaman að sjá hversu mikið grúppur einstaklinga minnkuðu mikið og var sérstaklega ánægjulegt að sjá hversu miklum framförum unglingarnir náðu. Nú er því komið að því að melta allar þessar nýju upplýsingar og byrja stífar æfingar til að halda áfram þar sem frá var horfið.