Í kvennaflokki varð María Rós Arnfinnsdóttir úr Skotfélagi Reykjavíkur Íslandsmeistari með 44/99 stig, Helga Jóhannsdóttir úr SÍH varð önnur með 36/90 stig og í þriðja sæti Dagný Huld Hinriksdóttir úr SR með 29/87 stig.

Ólympíufarinn Hákon Þór Svavarsson úr Skotíþróttafélagi Suðurlands jafnaði í dag, á Íslandsmeistaramótinu á Akureyri, eigið Íslandsmet í haglabyssugreininni Skeet, 122 stig af 125 mögulegum. Skotserían var glæsileg, 25-24-24-24-25. Í úrslitunum í karlaflokki varð Hákon svo Íslandsmeistari með 50/122 stig, í öðru sæti varð Arnór Logi Uzureau úr SÍH með 49/115 stig og í þriðja sæti Jakob Þór Leifsson úr SFS með 40/112 stig. Emil Ísak Jónsson úr Skotíþróttafélagi Hafnarfjarðar var Íslandsmeistari í unglingaflokki.

Skipulagsstofnun hefur samþykkt breytt Aðalskipulag Reykjavíkur og staðfest það með lögbundnum hætti.

Við lögðum því inn nýja umsókn um endurnýjað starfsleyfi vegna starfseminnar á Álfsnesi á fimmtudaginn. Nú fer þetta í ferli hjá Heilbrigðiseftirliti Reykjavíkurborgar sem síðan auglýsir tillögu að nýju leyfi í framhaldinu. Áætla má að ef engar frekari hindranir finnast að við gætum hafið starfsemi í september.

ENN FREKARI TAFIR á opnun skotsvæðisins á Álfsnesi. Það fer nú að verða vandræðalegt hvernig staðið hefur verið að þessum málum í Reykjavík. Lesa má niðurstöðu Skipulagsstofnunar 8.júlí hérna: https://skipulagsgatt.is/issues/2023/716 

Landsmóti STÍ í Compak Sporting var að ljúka á Akureyri. Í einstaklingskeppninni sigraði Jón Valgeirsson úr SR með 193 stig og í liðakeppninni náði sveit SR bronsinu en hana skipuðu Jón Valgeirsson, Dagný H. Hinriksdóttir og Þorri Helgason. Nánari úrslit koma svo á úrslitasíðu STÍ um leið og mótaskýrslan berst.

Aðalfundur félagsins var haldinn í Egilshöllinni 12.júní. Formaður flutti skýrslu stjórnar og gjaldkeri skýrði reikninga félagsins. Almennar umræður fóru fram um sorgarsögu svæðamála félagsins á Álfsnesi og framtíðarmöguleika þar. Fram kom að félagið stóð frammi fyrir sömu aðstæðum þegar svæði þess í Grafaholti var lokað árið 2000. Þá var því lokað í átta ár !! Nýtt svæði hafði þá loks fundist eftir ítarlega leit á stór höfuðborgarsvæðinu, Álfsnesið og var það að allra mati eina svæðið sem kæmi til greina undir skotíþróttavelli til framtíðar. Það var svo opnað formlega haustið 2008 og fyrsta SR OPEN haldið með góðum gestum erlendis frá. Nýjustu vísbendingar eru til þess að opnun svæðisins gæti átt sér stað í haust en þá til bráðabirgða í 4 ár eða þar til endanlegt svæði undir starfsemina hefur fundist.

Ný stjórn félagsins er nú þannig skipuð að Jórunn Harðardóttir er formaður, Arnbergur Þorvaldsson varaformaður, Guðmundur Kr Gíslason gjaldkeri, Kjartan Friðriksson ritari, Magni Þ. Mortensen meðstjórnandi og varamenn eru Sigfús Tryggvi Blumenstein og Þorsteinn Bjarnarson.