Axel Sölvason, heiðursfélagi og fyrrverandi formaður Skotfélags Reykjavíkur, lést 15. október sl.

Axel starfaði lengi vel fyrir skothreyfinguna að margvíslegum málefnum er varðar skotíþróttina. Axel var fyrsti formaður Skotsambandsins, við stofnun þess árið 1979. Hann fékk æðsta heiðursmerki Skotsambandsins fyrir störf sín í þágu skotíþróttarinnar. Einnig var hann sæmdur gullmerki Íþrótta-og Ólympíusambands Íslands.

Axel er eini íslendingurinn sem hafði A-réttindi í dómgæslu skotíþrótta og hafði m.a réttindi til að dæma á stærstu mótum á erlendri grund.

Axel keppti í skotíþróttum hér heima og erlendis á sínum yngri árum og starfaði í kjölfarið lengi vel við dómgæslu á hinum ýmsu skotmótum hér heima í fjölmörgum skotgreinum.

Stjórn Skotfélags Reykjavíkur þakkar Axel Sölvasyni samstarfið á liðnum árum og sendir fjölskyldu hans samúðarkveðjur sínar.

Útförin fer fram miðvikudaginn 30. október nk. í Lindakirkju Kópavogi kl 11:00.

Þýska deildin, Bundesligan, í loftbyssugreinunum er nú byrjuð af fullum krafti. Ásgeir Sigurgeirsson er eini Íslendingurinn sem keppir í deildinni. Hann keppir með SGi Ludwigsburg. Félögin eru skipuð 5 keppendum í hverri umferð og skjóta allir 40 skotum. Um þessa helgi sigraði lið hans báða leikina 5:0. Ásgeir náði ágætis skori í gær 387 og í dag 382 stig. Árangur hans í gær er sérstakur að því leiti að búnaður hans skilaði sér ekki úr fluginu og keppti hann því með lánsbúnaði.

Fyrsta mót keppnistímabilsins í innigreinunum fór fram í aðstöðu Skotdeildar Keflavíkur í dag.

Í keppni með loftriffli sigraði Guðmundur Helgi Christensen úr Skotfélagi Reykjavíkur með 587,3 stig, annar varð Þórir Kristinsson úr Skotfélagi Reykjavíkur með 558,2 stig og í þriðja sæti Leifur Bremnes úr Skotíþróttafélagi Ísafjarðar með 516,7 stig.

Í flokki stúlkna í keppni með loftskammbyssu sigraði Sóley Þórðardóttir úr Skotfélagi Akureyrar með 516 stig sem er nýtt Íslandsmet stúlkna. Í öðru sæti varð Sigríður Láretta Þorgilsdóttir einnig úr SA með 501 stig. Saman skipuðu þær sveit Skotfélags Akureyrar ásamt Þorbjörgu Ólafsdóttur, sem sigraði í kvennaflokki með 510 stig. Þar varð önnur Aðalheiður Lára Guðmundsdóttir úr Skotgrund Skotfélagi Snæfellsness með 459 stig. Árangur sveitarinnar er einnig nýtt Íslandsmet í kvennaflokki, 1527 stig.

Í karlaflokki sigraði Ívar Ragnarsson úr Skotíþróttafélagi Kópavogs með 552 stig, annar varð Peter Martisovic úr Skotíþróttafélagi Kópavogs og í þriðja sæti Þórður Ívarsson úr Skotfélagi Akureyrar með 543 stig.

Úrslit alþjóðamótsins í haglabyssugreininni Skeet sem haldið var á skotvelli Skotíþróttafélags Suðurlands um helgina liggja nú fyrir. Keppnin er haldin árlega um alla Evrópu og er þetta í annað sinn sem hún fer fram á Íslandi. Eingöngu konur geta tekið þátt og er keppt í A og B flokki en þær sem hafa keppt fyrir hönd þjóðar sinnar í landsliði keppa í A-flokki en aðrar í B flokki.

Alþjóðlega "Ladies International Grand Prix" mótið í haglabyssugreininni SKEET fer nú fram í Þorlákshöfn. Keppni í dag hefst kl.10:00 og eins á morgun laugardag. 15 keppendur eru mættir til leiks.