Vegna hertra reglna Sóttvarnarlæknis hefur stjórn félagsins ákveðið að fresta opnun Egilshallar til a.m.k. 3.nóvember 2020. Ef breytingar verða á reglum mun stjórn endurskoða þessa ákvörðun sína.

Í framhaldi af hertum reglum Sóttvarnarlæknis mun félagið gera breytingar á iðkun skotfimi á Álfsnesi. Félagsheimilið verður lokað gestum en starfsmenn taka við æfingagjöldum, ráðstafa lúgum á riffilvelli og plássi á haglavöllum við innganginn. Iðkendur þurfa því að bíða í bílum sínum þar til röðin kemur að þeim. Lúgur í riffilhúsi verða opnaðar af starfsmönnum og borð þrifin eftir hvern iðkanda. Önnur hver lúga verður opin.

ATH. Skotvopnanámskeiðin byrja kl.12:00

FRÁ FJÖLSKYLDU GUNNARS SIGURÐSSONAR:

Til margra ára hefur faðir okkar Gunnar Sigurðsson helgað sig skotíþróttinni á Íslandi, unnið ötullega að því að byggja upp sterkar og góðar skotsveitir, þjálfað stóran hóp fólks og starfað að mörgum verkefnum innan skotíþróttarinnar. Fórnir hans til íþróttarinnar eru ómetanlegar fyrir alla sem notið hafa góðs af, aðildarsambönd skotíþróttahreyfinga, Skotreyn og þeirra sem leiðbeiningar fengu hjá föður okkar.

En allt sem flýgur þarf niður að koma.

Það tilkynnist hér með að faðir, bróðir, afi og tengdafaðir okkar Gunnar Sigurðsson, leiðbeinandi og prófdómari, féll frá að morgni 02.10.2020 á sjúkrahúsi í Las Palmas Gran Canaria. Fjölskyldan biður alla að gefa okkur svigrúm til að meðtaka það sem komið er og fá að syrgja í friði.

Þeir sem vilja minnast Gunnars Sigurðssonar er bent á að bæta hittni á næsta ári um 10%. (Svo þessi tilkynning hljómi í anda föður okkar)

Fjölskylda og aðstandendur Gunnars Sigurðssonar

Ljósmynd: Gunnar Sigurðsson gerður að heiðursfélaga Skotfélags Reykjavíkur. Jórunn Harðardóttir formaður félagsins afhendir honum viðurkenninguna á aðalfundi félagsins árið 2014.

Íslandsmeistaramótið í Bench Rest Skor riffli fór fram á velli Skotfélags Húsavíkur um helgina. Skotið var á 100 og 200 metra færi, 25 skot á hvort færi. Íslandsmeistari varð Arnar Oddsson úr Skotfélagi Akureyrar með 495 stig og 25 X-tíur, Jóhannes Frank Jóhannesson úr Skotdeild Keflavíkur varð annar með 494 stig og 15 X-tíur og þriðji varð Kristján Arnarson úr Skotfélagi Húsavíkur með 492 stig og 27 X-tíur. Okkar maður Egill Þ. Ragnarsson varð fjórði með 492 stig og 17 X-tíur og Bergur Þ. Arthúrsson sjötti með 491 stig og 20 X-tíur. Nánar á úrslitasíðu STÍ hérna.