FRÁ FJÖLSKYLDU GUNNARS SIGURÐSSONAR:

Til margra ára hefur faðir okkar Gunnar Sigurðsson helgað sig skotíþróttinni á Íslandi, unnið ötullega að því að byggja upp sterkar og góðar skotsveitir, þjálfað stóran hóp fólks og starfað að mörgum verkefnum innan skotíþróttarinnar. Fórnir hans til íþróttarinnar eru ómetanlegar fyrir alla sem notið hafa góðs af, aðildarsambönd skotíþróttahreyfinga, Skotreyn og þeirra sem leiðbeiningar fengu hjá föður okkar.

En allt sem flýgur þarf niður að koma.

Það tilkynnist hér með að faðir, bróðir, afi og tengdafaðir okkar Gunnar Sigurðsson, leiðbeinandi og prófdómari, féll frá að morgni 02.10.2020 á sjúkrahúsi í Las Palmas Gran Canaria. Fjölskyldan biður alla að gefa okkur svigrúm til að meðtaka það sem komið er og fá að syrgja í friði.

Þeir sem vilja minnast Gunnars Sigurðssonar er bent á að bæta hittni á næsta ári um 10%. (Svo þessi tilkynning hljómi í anda föður okkar)

Fjölskylda og aðstandendur Gunnars Sigurðssonar

Ljósmynd: Gunnar Sigurðsson gerður að heiðursfélaga Skotfélags Reykjavíkur. Jórunn Harðardóttir formaður félagsins afhendir honum viðurkenninguna á aðalfundi félagsins árið 2014.

Íslandsmeistaramótið í Bench Rest Skor riffli fór fram á velli Skotfélags Húsavíkur um helgina. Skotið var á 100 og 200 metra færi, 25 skot á hvort færi. Íslandsmeistari varð Arnar Oddsson úr Skotfélagi Akureyrar með 495 stig og 25 X-tíur, Jóhannes Frank Jóhannesson úr Skotdeild Keflavíkur varð annar með 494 stig og 15 X-tíur og þriðji varð Kristján Arnarson úr Skotfélagi Húsavíkur með 492 stig og 27 X-tíur. Okkar maður Egill Þ. Ragnarsson varð fjórði með 492 stig og 17 X-tíur og Bergur Þ. Arthúrsson sjötti með 491 stig og 20 X-tíur. Nánar á úrslitasíðu STÍ hérna.

Reykjavíkurmótið í haglabyssugreininni SKEET, SR OPEN, fór fram á svæði Skotfélags Reykjavíkur á Álfsnesi í dag. Í A-flokki sigraði Daníel Logi Heiðarsson úr Skotfélagi Akureyrar með 46 stig í úrslitum (106 stig í undankepnninni), Daníel Hrafn Stefánsson úr Skotfélagi Reykjavíkur varð annar með 44 stig (106) og Guðlaugur Bragi Magnússon úr Skotfélagi Akureyrar varð þriðji með 31 stig (105). í B-flokki sigraði Jón Valgeirsson úr Skotfélagi Reykjavíkur með 41 stig (94 stig í undankeppninni) Sigurður Áki Sigurðsson úr Skotfélagi Akureyrar varð annar og Björn G. Hilmarsson úr Skotfélagi Akraness varð þriðji. Reykjavíkurmeistari karla varð Daníel Hrafn Stefánsson úr SR og Reykjavíkurmeistari kvenna varð Dagný Huld Hinriksdóttir úr SR.

SR OPEN mótið verður skotið á einum degi ! Mótsstjórn hefur ákveðið að mótið verði haldið á einum degi, laugardeginum, m.a.vegna slæmrar veðurspár, en skipt verður í A og B úrslit eftir 75 dúfur. Vegleg verðlaun verða veitt í lok móts en styrktaraðilar mótsins eru Ísnes, Hlað, Vesturröst og ÓJK að öðrum ólöstuðum. Einnig verður dreginn út Tikka T1x cal.22 riffill til eins heppins þátttakanda sem verður á staðnum við mótsslit. Matarveislan verður síðan um kl.18:30

Riðlaskiptingin um helgina er komin hérna.