Ásgeir Sigurgeirsson keppir á Evrópumeistaramótinu í loftskammbyssu á laugardaginn. Mótið fer fram í Finnlandi. Nánar á heimasíðu mótshaldara. Hægt verður að fylgjast með skorinu í keppninni í beinni hérna. Ásgeir byrjar kl. 11:00 að staðartíma eða kl. 09:00 að íslenskum tíma. Úrslitin eru svo kl. 14:30 að staðartíma eða kl. 12:30 að íslenskum tíma. Ef Ásgeir lendir í hópi fjögurra efstu tryggir hann sér þátttökurétt á Ólympíuleikunum í London í ágúst.

Á Landsmóti STÍ í 60sk liggjandi riffli sem haldið var í Kópavogi í dag, sigraði okkar maður, Guðmundur Helgi Christensen og náði jafnframt meistaraflokksárangri, 587 stigum. Í öðru sæti varð Stefán E. Jónsson SFK með 582 stig og þriðji varð Guðmundur Valdimarsson SÍ með 573 stig.

Á Reykjavíkurmótinu sem var haldið í Egilshöllinni í dag setti Íris Eva Einarsdóttir úr Skotfélagi Reykjavíkur nýtt Íslandsmet í loftriffli 383 stig af 400 mögulegum !  Í loftriffli karla sigraði Guðmundur Helgi Christensen SR með 559 stig og Sigfús Tryggvi Blumenstein SR varð annar með 522 stig. Í loftskammbyssu karla sigraði Ásgeir Sigurgeirsson SR með 585 stig en Íslandsmet hans er 586 stig ! Í öðru sæti varð Tómas Viderö SFK með 569 stig og Gunnar Þór Hallbergsson SR varð þriðji með 546 stig. Í loftskammbyssu kvenna sigraði Jórunn Harðardóttir SR með 371 stig, önnur varð Kristína Sigurðardóttir SR með 362 stig og í þriðja sæti Berglind Björgvinsdóttir SKA með 346 stig. /gkg

Reykjavíkurmótið í loftskammbyssu og loftriffli verður haldið í Egilshöllinni miðvikudaginn 8.febrúar. Hefja má keppni milli kl. 16:00-20:00. Lokað er fyrir almennar æfingar í Egilshöll, bæði í loft og púðursalnum.

Íþrótta- og Ólympíusamband Íslands - ÍSÍ, fagnar 100 ára afmæli sínu 28. janúar 2012 en sambandið var stofnað þann dag í Bárubúð árið 1912.  Alls mættu 25 fulltrúar frá sjö félögum á stofnfund sambandsins en það voru fulltrúar frá Reykjavíkurfélögunum Glímufélaginu Ármanni, Íþróttafélaginu Kára, Íþróttafélagi Reykjavíkur, Knattspyrnufélaginu Fram, Knattspyrnufélagi Reykjavíkur, Umf. Reykjavíkur og Umf. Iðunni. Að auki var á fundinum lögð fram ósk frá fimm félögum í viðbót að gerast stofnfélagar sambandins.  það voru félögin Skautafélag Reykjavíkur, Sundfélagið Grettir og Akureyrarfélögin Íþróttafélagið Grettir, Glímufélagið Héðinn og Umf. Akureyrar.  Axel Tulinius var kosinn fyrsti forseti ÍSÍ.

Á afmælisdaginn sjálfan ætlar ÍSÍ að halda hátíðarfund framkvæmdastjórnar í fundarsalnum Bárubúð í Ráðhúsi Reykjavíkur.  Að honum loknum mun ÍSÍ bjóða boðsgestum til móttöku í Ráðhúsi Reykjavíkur.   Á afmælisárinu verða fjölmargir viðburðir á dagskrá, bæði viðburðir sem ÍSÍ stendur fyrir en einnig viðburðir sem verða skipulagðir af sambandsaðilum ÍSÍ um land allt eða í samstarfi við sambandsaðila og aðildarfélög þeirra.

ÍSÍ er síungt samband  og framtíðin er björt hjá íslenskri íþróttahreyfingu.  ÍSÍ óskar íþróttahreyfingunni og landsmönnum öllum til hamingju með 100 ára afmælið.