Ásgeir Sigurgeirsson keppti í dag í undanrásunum í Frjálsu skammbyssunni(50m Pistol). Hann var í seinni riðlinum sem hófst kl.09:15 að okkar tíma. Hægt er að fylgjast með hérna. Hann endaði með 550 stig og flaug áfram í úrslitakeppnina sem er á morgun.  Hann keppir einnig í Loftskammbyssu á sunnudaginn.

Lokað verður á skotsvæðinu okkar á Álfsnesi fram yfir Smáþjóðaleikana. Við opnum aftur laugardaginn 6.júní n.k. kl.10. Uppsetning búnaðar vegna keppni leikanna stendur nú yfir og verður aðeins opið fyrir æfingar keppnisliða félagsins á þessum tíma og síðan hefjast leikarnir í næstu viku.

Á morgun þriðjudaginn 26.maí þurfum við aðstoð á Álfsnesi við að leggja 300 fermetra af túnþökum. Mætum öll kl.18:00 og hespum þessu af. Eins þarf að sá grasfræjum í nokkra fermetra.

Aðalfundur félagsins verður haldinn í félagsheimilinu á Álfsnesi fimmtudaginn 28.maí n.k. og hefst hann kl.19:00

Á landsmóti STÍ í haglabyssugreininni Skeet, sem haldið var á velli Skotíþróttafélags Suðurlands við Þorlákshöfn, sigraði Örn Valdimarsson úr SR í karlaflokki með 114+12+11 stig. Annar varð Hákon Þ. Svavarsson úr SFS með 114+12+9 stig og þriðji Guðlaugur B. Magnússon úr SA með 105+13+13 stig. Í liðakeppninni sigraði A-sveit Skotfélags Reykjavíkur með 308 stig en hana skipuðu Örn Valdimarsson, Sigurður U. Hauksson og Kjartan Ö. Kjartansson. Í öðru sæti varð B-sveit Skotfélags Reykjavíkur með 296 stig en hana skipa Guðmundur Pálsson, Karl F. Karlsson og Sigtryggur Á. Karlsson. Í þriðja sæti hafnaði sveit Skotíþróttafélags Hafnarfjarðar með 284 stig en sveitina skipa Jakob Þ. Leifsson, Sigurður J. Sigurðsson og Aðalsteinn Svavarsson. í kvennaflokki sigraði Dagný H. Hinriksdóttir úr SR með 43+8+7/2 stig eftir bráðabana við Snjólaugu M. Jónsdóttur úr MAV með 48+8+7/1 stig. Árangur Snjólaugar í undankeppninni, 48 stig, er jafnframt jöfnun á hennar eigin Íslandsmeti. í þriðja sæti varð Helga Jóhannesdóttir úr SÍH með 38+12+10 stig.