Fyrsta landsmót Skotsambands Íslands í loftgreinum þetta keppnistímabil var haldið í Íþróttahúsinu Digranesi sunnudaginn 19. október. Mikil og góð þátttaka var í mótinu og var ánægjulegt að sjá nokkra nýja keppendur í mótinu en þessir nýju keppendur voru allir í kvennaflokki og stúlknaflokki.
Í loftriffli karla sigraði Guðmundur Helgi Christensen, Skotfélagi Reykjavíkur, með 582,4 stiga skori. Theódór Kjartansson, Skotdeild Keflavíkur varð annar með 541,2 sig og Þorsteinn Bjarnarson, Skotfélagi Reykjavíkur, varð þriði með 464,3 stig.
Í kvennaflokki loftriffilsins voru tveir keppendur, báðir úr Skotfélagi Reykjavík. Þar hafði Íris Eva Einarsdóttir betur en formaður sinn, Jórunn Harðardóttir, Íris Eva skoraði 407,3 stig en Jórunn 384.3 stig.
Í loftskammbyssu karla var það íslandsmethafinn Ásgeir Sigurgeirsson, Skotfélagi Reykjavíkur, sem sigraði með 577 stigum, 12 stigum frá íslandsmeti sínu, nýstiginn upp úr flensu. Thomas Viderö, Skotfélagi Kópavogs, varð annar með 562 stig og Stefán Sigurðsson, einnig úr Skotfélagi Kópavogs vað þriðji með 547 stig.
Skotfélag Kópavogs sigraði í liðakeppninni með 1637 stig en sveitina skipuðu þeir Thomas og Stefán auk Ólafs Egilssonar.
Í loftskammbyssu kvenna sigraði formaður Skotfélags Reykjavíkur, Jórunn Harðardóttir með 366 stig. Bára Einarsdóttir, Skotfélagi Kópavogs, varð önnur með 361 stig og Andrea Ösp Karlsdóttir, einnig úr Skotfélagi Kópavogs, varð þriðja með 335 stig.
Í liðakeppni kvenna sigraði sveit Skotfélags Kópavogs með 1002 stig. Sveitina skipuðu þær Bára, Andrea Ösp og Guðrún Hafberg.
Í unglingaflokki stúlkna sigraði Margrét Þ. Skowronski, Skotfélagi Reykjavíkur, með 234 stig.

Opnað var formlega fyrir rafræna skráningu þann 3. október fyrir sjálfboðaliða á Smáþjóðaleikana 2015. Þegar eru á annað hundrað sjálfboðaliðar búnir að skrá sig.
Skráningin fer fram rafrænt og eru allar upplýsingar á heimasíðu Smáþjóðaleikanna 2015 http://www.iceland2015.is/
Skráningin fer fram í tveimur skrefum. Í fyrstu eru skráðar grunnupplýsingar, þær vistaðar og berst til baka tölvupóstur á skráð netfang með vefslóð fyrir síðari hluta skráningar. Í seinna skrefinu er farið inná vefslóðina þar sem grunnupplýsingarnar koma fram og haldið áfram með ítarlegri skráningu. Í þessu skrefi geta þeir sjálfboðaliðar sem ætla eingöngu að vinna fyrir ykkar keppnisgrein skráð það í síðustu spurninguna þar sem spurt er „Annað sem þú vilt að komi fram og skiptir máli“. Þar er t.d. hægt að skrá „Vinn við keppni í skotíþróttum“. Athugið að mikilvægt er að þið sérstaklega hvetjið ykkar lykilstarfsmenn að skrá sig tímanlega.
Eftir að seinna skrefinu er lokið er alltaf möguleiki að fara aftur inná skráninguna sína og gera breytingar ef þess er þörf.

Keppnistímabil Skotsambands Íslands hófst í dag, laugardaginn 18. október í Íþróttahúsinu Digranesi þar sem Skotfélag Kópavogs hélt landsmót í 50m liggjandi riffli. Arnfinnur Auðunn Jónsson, Skotfélagi Kópavogs sigraði í karlaflokki og setti hann jafnframt nýtt Íslandsmet í greininni, 619,6 stig og bætti hann gamla met Jóns þórs Sigurðssonar um 1,3 stig. Guðmundur Helgi Christensen, Skotfélagi Reykjavíkur, varð annar með 606.9 stig og Valur Richter, Skotíþróttafélagi Ísafjarðar,hreppti þriðjasætið með 603,1 stig. Í kvennaflokki sigraði Bára Einarsdóttir, Skotfélagi Kópavogs, með 609 sti og Jórunn Harðardótti, Skotfélagi Reykjavíkur, varð önnur með 607,8 stig.Í liðakeppni karla sigraði Skotfélag Kópavogs með 1815,9 stigum en sveitina skipuðu Arnfinnur Jónsson, Stefán Eggert Jónsson og Karl Einarsson. Í öðru sæti varð sveit Skotíþróttafélags Ísafjarðar, skipuð Vali Richter, Ívari Má Valssyni og Leifi Bremnes. Sveit Skotdeildar Keflavíkur varð í þriðja sæti en þá sveit skipuðu Theodór Kjartansson, Bjarni Sigurðsson og Alfreð Fannar Björnsson.

Framkvæmdum við veginn inná skotsvæði okkar á Álfsnesi er nú að ljúka. Komið er slitlag á allan veginn og hluta bílastæðanna. Gerður var afar hagstæður samningur við verktakann sem var að fræsa úr Hvalfjarðargöngunum. Það efni var keyrt í veginn og veghefill og valtari voru við vinnu alla helgina við að jafna efninu út og þjappa. Nú er svo komið að vegurinn er orðinn fær venjulegum fólksbílum. Við þurfum samt að aka varlega og þjappa veginn með hægum akstri næstu vikurnar. Mælumst við til að menn aki ekki hraðar en 15 km/klst.

Innanríkisráðuneytið hefur birt tillögur sínar að breytingum á gildandi vopnalögum. Vopnalagafrumvarpið sem verið hafði fyrir þinginu fyrir nokkrum árum hefur verið lagt til hliðar og vinna lögð í að breyta gildandi lögum. Hægt er að kynna sér frumvarpið hérna.